گار ءُ بیگواھیں بلوچانی نام ءَ
دگہ تو چُنت کنے سرمچار زندان ءَ
بلوچ ءِ پُسّگاں شیریں مزار زندان ءَ
گِسر کنے تو گْوھارانی سالونکیں براتاں
دل ءَ تو دردے بکشائِے بزگیں ماتاں
پتانی جگر ءِ ٹُکر کُجا کہ بیگواہ اَنت
چہ کشے زرداں مدام ءَ آہ ءُ پریاتاں
کنانے ھمبلاں بیگواہ ءُ گار زندان ءَ
بلوچ ءِ پُسّگاں شیریں مزار زندان ءَ
بگوار بگوار وتی زلم ءِ شِل سریں تیراں
بُکش ءُ بُکش تو بلوچ ءِ وراناہ ءُ پیراں
آ نشتگاں مدام دروگیں پندلاں سازاں
بباتاں کرسی مبارک لیڈر ءُ میراں
جند ءِ براساں بر اَنت واجھکار زندان ءَ
بلوچ ءِ پُسّگاں شیریں مزار زندان ءَ
پُلیت ند ءَ منی دنت چَرس ءُ تریاک ءَ
آ کشیت جان ءِ منی ھاٹیگ ءُ گویاک ءَ
گُشیت چو رستر ءَ کَپ تو زمین ءِ دلبند ءَ
ببو تو بے ھال وتی گلزمین ءِ چہ ھاک ءَ
بلوٹ ئے ھکّ ءَ وتی بے تو گار زندان ءَ
بلوچ ءِ پُسّگاں شیریں مزار زندان ءَ
گوں جان ءِ ھوناں وتی گلزمین ءَ رنگ کناں
داں بلوچ ءِ کودکے مانیت گوں توجنگ کناں
ما وتی زمین ءِ سرا ھچ وڑ ا ترا نیلاں
تئی ما پادگاں پروشاں ترا لنگ کناں
وفا کُربانیں پہ ماتیں ڈگار زندان ءَ
بلوچ ءِ پُسّگاں شیریں مزار زندان ءَ
سرباز وپا
