پھازداری ءُ ناشرکاری ءِ جنگ
نبشتہ کار: سرباز وپاؔ
گْوستگیں روچ ءَ بلوچ ءِ ناترس ءُ گیرتمندیں پسگاں ءُ کنگریں پدائیاں نوشکے ءَ پہ وتی ماتیں سرڈگار ءِ رکینگ ءَ داں بازیں اداراں جنگ داتگ ءُ وتی تنگھ ءُ تلاھیں ساہ ءُ سرانی دیمونی داتگ۔ ھمے بنجل ءِ تہ ءَ دُژمن ءِ بازیں جنین ءُ زھگے ھم ساڑی بیتگ اَنت، مئے بلوچ راجی شھیداں آیانی ھیالداری کرتگ ءُ آیاں ءَ پہ سلامتی یلہ داتگ ءُ ھچ وڑیں تاوان نہ داتگ۔
شھید اے گپ ءَ سرپد بیتگ اَنت کہ دُژمن ءِ کھول ءِ مردم اَنت۔ دُژمن ءِ جنین ءُ زھگانی ھیالداری کنگ ھم اے گپ ءِ گْواہ اِنت کہ بلوچ ناشرکار نہ اِنت، اگاں ناشرکار بوتین اَنت گڑا دُژمن ءِ زھگ ءُ جنین ھم ماپ کنگ نہ بوتگ اِت اَنت بلکیں دُژمن ءِ زھگ ءُ جنینانی ھیالداری کنگ ءِ مول ھمیش اِنت کہ آ جھان ءَ پیشدارگ لوٹ اَنت کہ بلوچ ناشرکار نہ اِنت بلکیں بلوچ پہ وتی سرڈگار ءِ پھازداری ءَ جنگ کنگ ءَ اِنت۔
بلے مئے ناشریں دُژمن اے وڑ نہ کنت، آئی ءِ چمّاں مئے سنگتانی زھگ ءُ جنین ھم میار بار اَنت۔ آئی ءِ دور گْوستگیں روچان 18 جنوری 2022 ءَ پاکستانی لشکر ءَ وھدے سبی ءِ دمگ لونی ءَ لشکر کشی کنت گڑا بلوچ راجی جھدکار پرویز ڈومکی شھید کنگ بیت، گڑا پاکستانی لشکر ءِ کارمند آئی ءِ مات ءَ دزگیر کنگ ءَ پد شھید کنت، آ رستر ھمے گْوش ایت کہ اے یک بلوچ جُھدکارے ءِ مات اِنت۔
اگاں بلوچ پدائیاں بہ لوٹ اِتیں ھمے وڑ کرت نہ کرتگ اَت؟ گڑا مردم اے چیزانی سر ءَ ھورت چاری کنت، مردم دوست ءُ ناشرکار ءِ پرک ءَ گیشین ایت۔ بلوچ ھچبر ناشرکار نہ اِنت بلکیں پہ وتی ماتیں سرڈگار ءِ رکینگ ءَ جُھد کنگ ءَ اِنت۔
