نبشتہ کار : سرباز وپاؔ
26 مئی 2020 ءَ پاکستان ءِ داشتگیں چریکاں کیچ ڈنک ءَ گْوھار ملکناز ءَ شھید کرت ءُ آئی ءِ اُردلیں بْرمش ءَ ٹپّی کُرت۔ پہ بلوچ راج ءَ اے سکیں تورناکیں ویلے کہ بلوچ ءَ مُدام پہ وتی لج ءُ ننگ ءِ رکینگ ءَ مُدام وتی ساہ ءُ سر ندر کرتگ اَنت ، بلے وتی دُژمن نہ بکش اِتگ۔ چہ شھید ملکناز ءِ شھیدی ءَ پد سرجمیں راج گوں وتی جوش ءُ جزبگ ءَ پاد کیت توار چِست کنت، انساپ ءِ لوٹ ءَ کنت۔ بلے اے گپ زانگ بہ بیت چہ کے ءَ انساپ؟ چہ ھما سرکار ءَ انساپ کہ گْوھار منلکناز ءِ شھید کنگ ءُ اردلیں بْرمش ءِ ٹپّی کنگ ءَ ھمے سرکار ءِ دست ھوار اِنت؟ تھنا گْوھار ملکناز ناں اِد ءَ ھر بلوچ پرزند شھید کنگ بیت ، آئی ءِ دُژمن ھمے سرکار ءِ جند اِنت، چہ ھمائی ءِ پرمان ءَ دُز ءُ ڈُنگ کار کن اَنت۔
پہ شھید ملکناز ءِ زوراکیں کوش ءِ ھلاپ ءَ لَس مھلوک توار چِست کنت۔ سرکار پہ مھلوک ءِ توار ءِ دارگ ءِ ھاتر ءَ آئی ءِ کُشندھاں دزگیر کنت داں مھلوک ھاموش بہ بیت۔ شھید ملکناز ءِ کُشوک التاپ مزار ، باست پیزمھمد ، سمیر سبزل ءُ سیپ اُلہ دزگیر کنگ بنت۔ بلکیں بلوچستان ءِ تہ ءَ اے وڑیں ھزاراں دُز ءُ ڈنگ سرکار ءَ رودینتگ۔ بلوچستان ءِ ھمُک ھند ءَ ناشرکاری بوگ ءَ اِنت ءُ پاکستان سرکار ءِ دست ھوار اِنت۔ چہ شھید ملکناز ءَ پد گْوھار کلسوم شھید کنگ بیت، چہ اشان اَبید بلوچستان ءِ ھمک ھند ءَ دُژمن ءِ اے وڑیں زوراکی ءِ وئیل گندگ بیت۔
بلکیں سمیر سبزل تھنا شھید ملکناز ءِ کشندہ نہ اِنت ، آئی ءِ سر ءَ دگہ بازیں کیس بوتگ، آئی سروکی ءَ دگہ بازیں ناشرکاری کنگ بوتگ ۔ راج دُژمنیں سمیر سبزل ءِ یلہ کنگ بلوچ راج ءِ آزگیں ٹپّاں واد پریچگ ءِ درور اِنت پمیشکا بلوچ راج ءِ لَج ءُ ننگ ملکناز ءِ کشندہ آھانی چمانی دیم ءَ آجو کنگ بیت۔سمیر سبزل ءِ یلہ کنگ ھمے گپ ءِ پدرائی ءَ کنت کہ کجام مردم ءَ ناشرکاریں پاکستان ءِ سبزیں بیرک من اِت، آ چنچو بلوچ پرزند بہ کُش اِیت آ بے میار اِنت۔ شھید ملکناز ءِ ھون چہ ناشرکاریں مُلک ءَ آجوئی ءِ لوٹ اَنت۔
