آزمانک: ادنان شرابی
نبشتہ کار سرباز وپاؔ
کمبر ءُ ادنان دو دلدوستیں سنگت اِت اَنت، کمبر ءَ چار ءُ پنچ ماہ اَت کہ مزنیں شھر ءَ شُتگ اَت، ھمے شپ ءَ کہ کمبر وتی گس ءَ سر بوت، ادنان ءَ ھال ءَ گپت کہ کمبر چہ شھر ءَ آتکگ۔ ادنان ءِ ماس ءَ پہ ادنان ءَ چاہ دانی بِر کرتگ اَت کہ پہ ادنان ءَ چاہ کن آں، بلے کمبر ءِ ھال ءِ اشکنگ ءَ ادنان اد ءَ چاہ ءِ ورگی نہ بوت ءُ پاد آتک۔ ادنان ءِ ماس ءَ گوشت: ھاں ابّا۔۔ ابّا من پہ تو شنک بات آں من اے چاہ ءَ پہ تو کنگ ءَ آں بہ نند ءُ چاہ ءَ بور پد ءَ برو۔ انّاہ ماتی من اد ءَ چاہ نہ وراں کہ من ءَ دیر بیت، من وھدے کمبر ءِ کِر ءَ سر بہ باں من ءَ کمبر پہ زور چاہ وارین ایت۔ مات ءَ بزگ ءَ دگہ ھچ نہ گوشت ءُ وتی چاہ دانی ایر کرت۔ ادنان دیم پہ کمبر ءِ گِس ءَ رھادگ بوت۔
کمبر کہ ادنان ءَ را دیست دیم ءِ پاد آتک ءُ گوں ادنان ءَ ھمباز آں بوت ءُ دوئیں گُل وروکائی بوت اَنت کہ چار ءُ پنچ ماہ ءَ پد وت ءَ گندگ ءَ اِت اَنت۔ نشت ءُ وش آتک اِش کرت ءُ چہ وش آتک ءَ پد آیانی دیوان برجاہ بوت۔ چاہ ءُ نان اش وارت۔ ادنان ءُ کمبر وت ماں وت ءَ ٹیٹ گپ ءُ دیوان اِت اَنت کندگ ءُ مسکرائی کنگ ءَ اَت اَنت۔ کمبر ءِ سپر ھم دارجکش بوتگ اَت آئی ءَ ٹیٹ دمبرتگ اَت۔وھد ھم گوں وتی گاماں جنزاں اَت، اشانی دیوان برجاہ اَت۔
کمبر گوشت یار ادنان من ءَ سپر ءَ سک ژند ءُ پند کرتگ، منی دل لوٹگ ءَ اَنت کہ من کمو تچک بہ باں۔ گڑا من ماس ءَ گوش آں آ لِھپاں چیر گیج ایت من ءُ تو وپس ایں، ھُدا بہ کنت نوں من ءُ تو ھواریں گپ ءُ دیوان بیت۔ادنان شر اِنت کمبر تو آرام بہ کن من وپسگ ءَ وتی گِس ءَ روان، ھُدا وشین سھبے بہ کنت من الّم تئی چارگ ءَ کایاں۔ کمبر گوشت ادنان تو چو منی وڑ ءَ لُنڈے ئے پہ تو ھر کج ءَ مانا یک انگت ھمد ءَ بہ وپس شر اِنت۔
کمبر ءِ اے گپ ءِ کنگ ءَ دوئیناں دمانے ءَ ٹیٹ کند اِت ھھھھھھھ۔
ادنان گوشت ھو تئی اے راست اِنت بلے من وتی جاہ ءَ روان شرتر اِنت، سھب ءَ انشااللہ مھلہ کایاں۔کمبر گوشت ادنان من ءَ پہ تو چیزے گوں اِنت بلے انوں بے وھد اِنت سھب ءَ کسمت آتک ئے گڑا ترا دیانے ادنان انگت سرپد نہ اَت چیز چی یے ۔ گوشت ئِے شر انشا اللہ من سھب ءَ مھلہ کایاں۔ ادنان دیم پہ وتی گس ءَ شُت، ماس چہ آئی ءِ روگ ءَ ساری لھپ چیر گھتگ اِت اَنت، ادنان چہ مشک ءَ سارتیں آپے کشت ءُ وارت شُت وتی وابجاہ ءَ کپت ۔
وھدے سھب ءَ مھلہ ادنان واب ءَ پاد آتک ءُ چاہ ءِ ورگ ءَ پد دیم پہ کمبر ءِ نیمگ ءَ شُت۔ کمبر چہ واب ءَ پاد آتکگ اَت، جان ششتگ اَت ءُ چاہ ءِ ورگ ءَ اَت، ادنان ءَ سلام دات ءُ نشت دوئیناں چاہ وارت۔ کمبر گوشت یار ادنان مردم ھما دوریں کھور ءِ ساھگ ءَ بہ روت ءُ ھمود ءَ بہ نندیت وش نہ اِنت؟ ھو یار تئی دل لوٹگ ءَ اِنت بلے بہ رواں۔ کمبر ءِ ماس ءَ گوشت ابّا کمبر تئی نان ھشک اِنت من ءَ کروسے ھست بُہ کش ئے پد ءَ تو دیر کن ئے کمبر گوشت۔ امّا پِس ءَ بہ گوش کروس ءَ کشیت من انوں روان۔ دوئیں سنگت پاد آتک اَنت کمبر ءَ جگ ءُ دو گلاس زْرت، ماس دگہ ڈبی یے چہ سارتیں آپ ءَ پُر کرت ءُ دات اَنت۔ ماسا گوشت کمبر اے ڈبی ءَ ءُ گلاسے بزور بس اِنت جگ ءَ آدگہ گلاس ءَ مُپت ءَ چون کن ئے کمبر گوشت ایشی راز ءَ ترا من ھمود ءَ گُش آں۔
دوئیں رھادگ بوت اَنت ءُ دیم پہ ھما برزیں کھور ءِ ساھگ ءَ شُت اَنت۔ یار ادنان تو منی راز ءِ سنگت ئے من ترا گپے ھال دے آں تو دگہ کس ءَ ھچ مہ گُش ءُ منی گپ ءَ بزور شر اِنت۔ اگاں تو منی گپ ءَ زورے گڑا من ترا گشان ئے ! ادنان گوشت ناں یار من چوں تئی گپ ءَ نزوراں تو منی دوستیں سنگت ئے۔ کمبر ءَ چہ وتی لانک ءَ شراب ءِ بوتل کش اِت ءُ ادنان ءَ را گوشت ئِے بیا مرچی من ءُ تو ایشی وریں ادنان گوشت کمبر اے چی یے؟ یار ادنان تو ایشی نزان ئے اے شرابے۔ ادنان گوشت یار من ایشی نام اشکرتگ، بلے من نہ دیستگ۔ ھو یار تو مرچی ایشی وشی ءَ ھم گندئے۔
کمبر ءَ گلاسانی تہ ءَ کم کمیں شراب مان کُرت آپ مان کنگ ءَ اَت۔ ادنان گوشت یار تو من ءَ ایشی بابت ءَ سرپد بہ کن اے چون کنت؟ کمبر: یار ادنان اے مردم ءَ سک مست ءُ توانگر کنت ایشی ءَ شھرانی تہ ءَ مزن مزنیں مردم ور اَنت۔ ھرکس چہ آیاں ترس ایت۔ شراب مردم ءَ سک ءَ بھادر کنت، شرابی ئیں مردم ءِ کِر ءَ ھرکس گپ کنگ ءَ ترس ایت۔ تو مرچی ایشی ءَ بور ءُ ایشی ءِ وشی ءَ سیل کن۔ ایشاں شراب ءِ ورگ بندات کرت، شراب ورگ ورگ ءَ انچوش مست بوت اَنت کہ آیاں وتی گونیں جگ ءُ گلاس ھمد ءَ دور دات اَنت ءُ دیم پہ گس ءَ رھادگ بوت اَنت۔ میتگ ءِ مردم ھرکس ایشاں گندگ ءَ اَت ءُ ھیران اَت۔ اے دوئینانی گپ ھمیش اَت کہ ما شراب وارتگ، اگاں ھرکس ءَ توار کرت ما آئی ءَ کش ایں۔
ایشاں چے کہ گنوکی کرت، گڑا سرجمین میتگ ءِ مردم آیانی دیم ءَ بے توار اِت اَنت ءُ آیانی پیریں ماس ءُ پسانی کدر ءَ کنگ ءَ اِت اَنت ۔ کمبر ءُ ادنان گنوک اِت اَنت کہ میتگ ءِ مردم مئے شراب ءِ نشہ ءِ دیم ءَ ترسگ ءَ اَنت۔ وھدے کہ کمو رند ءَ تر ایشانی نشہ پرشت گڑا کمبر گوشت ھاں ادنان من ترا نہ گوشتگ کہ شراب ءِ بیمے بلاھیں ؟ شراب ءَ یار سلام اِنت گوں وتی نشہ ءَ وللہ۔ ادنان ھما روچ ءَ ھمے گپ ءَ گنوک بوت کہ من ءَ الّم شھر ءِ روگ ءُ شراب ورگی اِنت۔ ادنان وتی پیریں پس ءِ گوکے پہ زور بھا کرت ءُ دیم پہ شھر ءَ شراب ءِ ورگ ءَ شُت کہ من رواں ٹیٹ شراب وران ءُ توانگر باں۔
ادنان ءَ ھمے گپ اشکرتگ اَت کہ مردم شراب ءَ پد گوشت ءُ کباب ور اَنت۔ آئی ءَ شھر ءَ یک روچے شراب وارت ءُ شُت ھوٹلے ءَ ترند ترند گوشت ھوٹل والا زوت کن پمن گوشت ءُ کباب بیار۔ آئی ءَ گوشت شر اِنت واجہ تو بہ نند من پہ تو زوت کباب تیار کناں ءُ کاراں۔ ادنان پد ءَ ترنداں ترند گوشت تو زاناں سرپد نہ ئے کہ من شراب وارتگ، اگاں تو دیر کرت من تئی ھوٹل ءَ مانداراں ءُ تئی جند ءَ کشاں ھوٹل ءَ والا پد ءَ گوشت: واجہ تو کمو تھمبُل کن من پہ تو کباب ءَ زوت کاراں۔ ادنان پہ زور وت ءَ تونگر کنگ ءَ اَت ءُ ھوٹل والا ءَ دات ئے زاھے کہ تو من ءِ مردمے سرپد نہ بئے ۔ ھوٹل والا آتک ءُ ادنان گپت زنچک ءَ گوشت برو ڑے ڈن ءَ تو نشتگ ءُ منی کِر ءِ وت ءَ توانگر کن ئے۔ آئی ءَ پہ زور ادنان چہ وتی ھوٹل ءَ کش اِت۔ ھوٹل والا ءَ گوشت: اول گپ ایش اِنت کہ منی ھوٹل ءَ شراب ءَ نشہ ئیں مردم ءَ آھگ ءِ موکل نیست۔ من تئی باز کدرت کرتگ، بلے وتی کدر اِت وت نزانتگ۔ ھوٹل ءَ پہ تیلانک ءُ پہ بے ازتی ادنان چہ ھوٹل ءَ کش اِت۔
ادنان ھوٹل ءِ دیم ءَ اوشتات ءُ کوکار کنگ ءَ اَت، گوشت ئِے او مردماں شما یک زروری گپے گوش بدار اِت۔ درستیں مردم پہ آئی ءِ گپ ءِ گوشدارگ ءَ ساڑی بوت اَنت، ادنان گوشگ ءَ اَت کہ من ءَ ھوٹل ءَ والا ءَ بے ازت کرتگ ءُ وتی ھوٹل ءَ کش اِتگ، من ھوٹل والا ءَ کشاں ءُ آئی ءِ ھوٹل ءَ مانداراں۔ مردم ھرکس زانگ ءَ اَت کہ اے چشیں مرد کشیں مردمے نہ انت۔ ھر کس آئی ءَ منت کنگ ءَ اَت کہ تو شراب وارتگ، برو جاھے ءَ بہ کپ، ھرکس کہ شراب وارت یک جاھے ءَ سھڑینت ءُ تّر ءُ گرد نہ کنت۔ بلے ادنان ءَ وت ءَ گیش گنوک کنگ ءَ اَت۔
یک پیریں ماسے ءَ دیست کہ اے مردم وتسر ءَ اے وڑ کوکار کنگ ءَ اِنت من رواں آئی ءَ منت کن آں، من جنینے آں بوت کنت آ منی کدر ءَ بہ کنت۔ پیریں جنین ءَ گوشت او منی ابّا من جنینے آں ءُ تئی ماس آں تو منی گپ ءَ گوش بدار کربانوں، چے گوش ئے ماسی؟ پیریں ماس ءَ گوشت ابّا تو اے وڑ ئے برو جاھے ءَ آرام بہ کن من پہ تو کربانوں۔ ادنان پیرزال ءَ را یک بدیں زاھے دات ءُ گوشت برو ھمانگو گرک بو تو نوکیں سرپد کنوکے بوتگ ئے ءُ من ءَ سر پد کن ئے۔ پیر زال ءَ دگہ ھچ نہ گوشت، آدگہ مردماں ءَ گوشت زھگاں من ءَ گوں اے نالاھک ءَ کار نیست شمازان اِت ءُ اے بے سُدیں مردک۔ بچک ءُ چوریگاں ادنان ءَ ٹیٹ لگت ءُ مُشت کرت، آ ھون ءُ ھونریچ بوت۔
وھدے کہ ادنان ءِ شراب ءِ نشہ پُرشت گڑا سک ملامت ملامت اَت۔ شُت ڈاکٹرے ءِ کِر ءَ وتی ٹپ ءُ ٹور ئِے درمان کرت اَنت ءُ ھمے جیڑ ات ئِے یار اے گپ رد اِنت کہ ھرکس چہ شرابی ءِ نہ ترس ایت من مُپت ءَ پس ءِ گوک بھا کرتگ ءُ مُپت ءَ وت ءَ بے ازت کناھینتگ۔ آئی ءِ دوا ھمیش اَت یا ھُدا مئے میتگ ءِ منی اے وڑیں بے ازتی ءَ سرپد مہ بنت۔ وھدے چار ءُ پنچ روچ ءَ پد وتی میتگ ءَ سربوت گڑا میتگ ءِ مردم آئی ءِ اے گپ ءَ پیسر ءَ سرپد اِت اَنت۔ ھرکس ءَ گوشت بیا ادنان شرابی ءُ ادنان چہ ملامتی ءَ وتی چماں چِست کرت کنگ ءَ نہ اَت۔
