زندگی تئی پاد ءِ چمپل سستگ اَنت
لچھ سرباز وپا
زندگی تئی پاد ءِ چمپل سستگ اَنت
دور یک گیابانے ءَ اُوشتاتگ ئے
نہ سمایے ھست ترا دگنیائی ءِ
نہ دگہ اوستے وتی دار ئے دل ءَ
اچ تماھاں دور ءُ گستا بوتگ ئے
شپ بہ بیت ءُ روچ بہ بیت مانا یک
ہر وڑ ءَ اے روچ امروز ءِ گوز اَنت
شرتر اِنت چہ دورئے چاراہ ءِ سر ءَ
کس مہ جیڑیت ءُ ترا پھمت مہ کنت
زندگی تئی پاد ءِ چمپل سستگ اَنت
ھو گوش اَنت کہ دل وتی بادشاہ وت اِنت
وت گریت ءُ وت وت ءَ وشان کنت
دائم ءَ کاریت شپانی کسھاں
ماھکانی دور دیدوکاں بلیت
یک شھمے ءَ دل ءَ رُژناہ کنت
کوش بیگاہ ءَ سلام ءَ کیت تئی
پہ ترا کاریت ھاک ءِ وشبوھاں
چَپ ءُ راست ءَ زِندمان ءِ سرپد ئے
چے دگہ لوٹ ئے جھان ءِ لِزتاں
زندگی تئی پاد ءِ چمپل سستگ اَنت
شنزتگ ھوراں مات کوھاں گوش ئے
ھو ھتانی سیاھگ ءَ کاہ رستگ اَنت
پرپکانی پُل بچکند اَنت گوش ئے
شور ءِ دیم ءَ بس انارترک میزر اَنت
امبری گْون پد ءَ کٹ ءَ رو اَنت
ھو کسوڑانی کٹارک رتکگ اَنت
پیرّگ ءَ اَنت گواش ءَ سالو ءِ رمگ
دور شنکانی توار گوش ءَ کپیت
بیت درا آسی گدروشکے کُڈک ءَ
بس من ءَ را پھل بہ کن من مھتل آں
زندگی تئی پاد ءِ چمپل سستگ اَنت
