من ءُ مکبول وپاؔ
نبشتہ کار: سرباز وپاؔ
سنگت مکبول وپا ءِ کتاب دردانی اوگار ءِ جار منی دیم ءَ گوستگ مردنی من سک ءَ وش بوت آں۔ وھدے کہ آئی ءِ کتاب شنگ بوت ءُ کتاب ءِ دیمدرائی دیوان بوت یا کہ دردانی اوگار ءِ سر ءَ چمشانکے منی دیم ءَ گوز اِیت من ءَ بے کساس وشی بیت۔ دردانی اوگار ءِ نبشتہ کار سنگت مکبول وپا من ءَ منی گوست ءِ ترانگاں گیج اِیت۔
کسے گْوش اِیت کہ مکبول وپا من ھمے سرپد بہ آں کہ آ منی نام ءَ گرگ ءَ اِنت، چی ءَ کہ بندات ءَ من ھم مکبول وپا بوتگ آں ءُ مکبول وپا ءِ نام ءَ شائِری کُرتگ۔ اے گپّ ءَ سنگت مکبول وپا ھم وت سرپد اِنت ءُ زانت۔ من ءَ منی ھند ءُ دمگ سیاد ءُ ازیزانی ھواری ءَ بازیں لبزانکی سنگتاں کہ ھما وھد ءَ دیستگ آ من ءَ انگت ءَ چہ مکبول وپا ءَ گیر کار اَنت۔
گپ چو اے وڑ ءَ اِنت کہ آ زمانگ ءَ رسانکدر نیست اَت، لبزانکی مواد تھنا کتابی دْروشم ءَ دست کپتگ اَت۔ من ءُ مکبول وپا دوئیں اے بارو ءَ سرپد نہ اَت اِیں کہ ما یکّیں نام ءَ بزاں مکبول وپا ءَ دو شائِر اِیں۔ مئے وت ما وت اِیں پجّاروکی چہ تاکبند الکاپ ءَ بوت۔ من ءَ نوں اے ھبر شر یات نہ بیت کہ تاکبند الکاپ ءِ دومی تاک ءَ مکبول وپا ءِ شیئر شنگ بوتگ اَت یا نہ بلے من چہ تاکبند الکاپ ءِ دومی تاک ءَ سنگت مھراللہ مھر ءِ نمبر زُرت ءُ گوں آئی ءَ رھوت کُرت کہ من ءَ وتی مواد تاکبند الکاپ ءَ شنگ کنائینگی اَنت گُڑا من ءَ مھر اللہ مھر ءَ گْوشت ھو سنگت تئی موداں ما الّم شنگ کن اِیں، بلے اے نام ءِ سر ءَ شُما دو شائر اِت۔ تو انچوش کن کہ بیا آواران ءَ ءُ شُما یکّے وپا ءَ یل بہ کنت ءُ یکّے وپا ءَ بِہ زُور اِیت۔ من گْوشت شر اِنت۔
من مھر اللہ مھر ھم پیش ءَ نہ دیستگ اَت، من وھدے آواران ءِ بازار ءَ شُت آں گوں مھر اللہ مھر ءَ رھوت کُرت گُڑا من ءُ مھراللہ دُچار کپت اِیں۔ من ءَ مھر اللہ مھر ءَ بُرت مکبول وپا ءِ دُکان ءَ ما مکبول وپا زُرت ءُ آواران ءَ پٹّان ءِ ھوٹل ءَ شُت ایں، ھما ھوٹل ءَ چاہ وارت ءُ دیوان بوت اِیں۔
گُڑا مھراللہ مھر ءَ گْوشت کہ شمُارا مکبول وپا ءِ سند کے ءَ گون اِنت؟ گُڑا اے چکاس ءَ من سوبین بوت آں، چی ءَ کہ آ سنگت ءِ پجّار کارڈ ءَ نام مکبول اھمد اَت ءُ منی پجّار کارڈ ءَ مکبول وپا اَت۔ گُڑا مھر اللہ مھر ءَ گْوشت کہ شر اِنت اے سنگت وتی پنّام ءَ مٹّ کنت تو سوبین بوتگ ئے، بلے من نہ منّ اِت، من وپا ھما سنگت ءَ را سر کُرت۔ چی ءَ کہ آ سنگت ءِ باز مواد شِنگ بوتگ اَت، ءُ اَچ من ءَ کابِل ءُ زانوگر اَت، من وپا یلہ دات نہ کُرت بلے مکبول یل دات۔
چوناھا ءَ منی اِرادہ اَت کہ پہ وتی پنّام ءَ وتی کماش ءِ نام ءَ بِہ زُور آں ءُ وتی نام ءَ مکبول ناسر بہ کن آں، بلے مکبول ناسر نامیں شائرے ھم ھست اَت، مکبول انور ءُ مکبول مھر، من چار اِت کہ مکبول نام ءِ سر ءَ دگہ ھم شائر باز اِنت، ھما روچ ءَ پد منی شئیر مھتاک ءُ تاکبنداں جتائیں ناماں شنگ بوتگ اَنت۔ چہ مکبول وپا ءِ یل کنگ ءَ پد منی اولی شئیر تاکبند الکاپ ءِ سیمی تاک ءَ وپا تاؤزھی ءِ نام ءَ شنگ بوتگ۔ آئی ءِ نام اَت ”مھلب“ منی پنچ یا شش شیئر وپا تاؤزھی ءِ نام ءَ شنگ بوتگ اَت۔ باز شئیر تھنا وپا بلوچ ءِ نام ءَ رسانکدر ءُ ھم شنگ بوتگ۔
بلے اے جار من کدی نہ جتگ کہ من مکبول وپا یل داتگ ءُ دگہ ناماں نبشتہ کنگ ءَ آں، بِہ گند ئے سنگت مکبول وپا ءِ اکس ءِ گِندگ ءَ اَبید آئی شئیر ءُ نبشتانکے منی پجّاروکاں دیستگ آ منی سرپد بوتگ آں، سرباز وپا ءِ نام ءَ منی اولی نبشتانک 2015 ءَ ماں سنگر تاک ءَ شنگ بوتگ، پد ءَ چہ 2018 ءَ من سرباز وپا ءِ نام ءَ نبشتہ کنگ بنگیج کُرتگ پد ءَ ھما اِنت ھمے نام ءَ نبشتہ کنگ ءَ آں، نوں ھمے منی نام ھمے پجّار۔۔۔۔۔۔۔
من انگت ءَ سنگت مکبول وپا ءِ کتاب نہ ونتگ کہ آئی ءِ کتاب ءِ سر ءَ گپ بہ کن آں، من وھدے آئی ءِ کتاب ءَ بوان آں الّم جھد کن آں کہ پہ ”دردانی اوگار“ ءَ دو دانک بہ نبیس آں۔
